Kriza e urisë katastrofike është e afërt në Gazën Veriore dhe Qytetin e Gazës, paralajmëroi sot një organizatë e spikatur ndërkombëtare për sigurinë ushqimore, transmeton Anadolu.
“Sipas skenarit më të mundshëm, të dyja, Qarku i Gazës Veriore dhe Qarku i Gazës janë klasifikuar në Fazën 5 të IPC-së (Uri) me prova të arsyeshme, me 70 për qind (rreth 210.000 njerëz) të popullsisë në fazën 5 të IPC-së (Katastrofë)”, thuhet në një përmbledhje speciale nga Iniciativa e Klasifikimit të Fazës së Sigurisë Ushqimore të Integruar (IPC).
Duke nënvizuar nevojën urgjente për një ndërprerje të menjëhershme të armiqësive dhe akses të qëndrueshëm për ofrimin e furnizimeve dhe shërbimeve thelbësore, raporti paralajmëroi se kriza e urisë “është shumë afër në qarqet veriore dhe parashikohet të ndodhë në çdo kohë midis mesit të marsit dhe majit 2024”.
“Pragu i urisë për pasigurinë akute të ushqimit në familje tashmë është tejkaluar shumë”, shtohet tutje.
Sipas shkallës IPC me pesë nivele, faza e pestë e “katastrofës/urisë” karakterizohet nga “uria, vdekja, varfëria dhe nivelet jashtëzakonisht kritike të kequshqyerjes akute”. Ajo këshillon veprime urgjente për të rikthyer ose parandaluar “vdekjen e përhapur dhe kolapsin total të mjeteve të jetesës”.
Izraeli ka zhvilluar një ofensivë ushtarake vdekjeprurëse në Gaza që nga një inkursion ndërkufitar nga grupi palestinez Hamas më 7 tetor 2023, në të cilin Tel Avivi thotë se janë vrarë 1.200 njerëz.
Më shumë se 31.700 palestinezë, kryesisht gra dhe fëmijë, janë vrarë që atëherë në enklavë nga sulmet izraelite dhe rreth 73.800 të tjerë janë plagosur, përveç shkatërrimit në masë dhe mungesës së nevojave.
Lufta izraelite ka shtyrë 85 për qind të popullsisë së Gazës në zhvendosje të brendshme, krahas një bllokade gjymtuese të shumicës së ushqimeve, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar, sipas OKB-së.
Izraeli akuzohet për gjenocid në GJND. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
