Kosovë, gjenden mbetje mortore që dyshohet të jenë të personave të zhdukur në luftë

Në varrezat e Hajvalisë në Komunën e Prishtinës janë gjetur mbetje mortore të cilat dyshohet se janë të personave të zhdukur gjatë luftës së fundit në Kosovë, transmeton Anadolu.

Në raportin 24-orësh të Policisë së Kosovës u bë e ditur se gërmimet në këtë zonë do të vazhdojnë edhe ditëve në vijim, në kërkim të mbetjeve tjera mortore.

“Njësitet policore të Drejtorisë për Hetimin e Krimeve të Luftës, në koordinim me Institutin e Mjekësisë Ligjore (IML) dhe Komisionin Qeveritar për Persona të Zhdukur, kanë realizuar urdhëresën e Gjykatës Themelore Prishtinë për gërmim në varrezat e fshatit Hajvali, me ç’rast kanë gjetur mbetje eshtërore të njeriut, që dyshohet të jenë të paktën të tre personave të zhdukur gjatë luftës së fundit në Kosovë 1998-1999”, thuhet në njoftim.

Njoftohet se mbetjet eshtërore janë tërhequr nga IML-ja për ekzaminime mjeko-ligjore.

Në luftën e fundit në Kosovë janë vrarë rreth 13 mijë njerëz ndërsa mbi 1.500 vazhdojnë të jenë të zhdukur.