Rajoni mund të përballet me mungesë prej mbi 190.000 punëtorësh në pesë vitet e ardhshme

Fuqia punëtore e aftë në rajon është zvogëluar ndjeshëm, dhe sipas projeksioneve, pritet të ulet me pothuajse 20 për qind deri në vitin 2050. Këtë e thekson Banka Botërore në raportin e saj për rritjen ekonomike në Ballkanin Perëndimor.

“Nëse vazhdojnë trendet aktuale të popullsisë, rritjes ekonomike dhe tregut të punës, rajoni mund të përballet me mungesë prej mbi 190.000 punëtorësh në pesë vitet e ardhshme,” thuhet në raport.

Rritja ekonomike e Ballkanit Perëndimor është ngadalësuar gjatë vitit 2025, pasi inflacioni ka çuar në rënie të konsumit, ndërsa pasiguria e shtuar ka kufizuar tregtinë dhe investimet, pavarësisht rritjes solide të pagave dhe kredive.

Për Maqedoninë e Veriut, Banka Botërore parashikon rritje ekonomike prej 2,6 për qind për këtë vit, 2,7 për qind në vitin 2026 dhe 2,8 për qind në vitin 2027. Krahasuar me projeksionet e vjeshtës së kaluar, ka një rritje prej 0,1 pikë përqindjeje për këtë vit dhe një ulje prej 0,3 pikë përqindjeje për vitin e ardhshëm.

Në raport theksohet se rritja ekonomike në Ballkanin Perëndimor pritet të ngadalësohet disi në vitin 2025 për shkak të kërkesës më të dobët të jashtme dhe pasigurisë ekonomike që buron nga ndryshimet në politikat tregtare globale, të cilat mund të ndikojnë negativisht te bizneset dhe besimi i konsumatorëve.

Projeksionet për rritjen ekonomike në Ballkanin Perëndimor
Banka Botërore parashikon që rritja e kombinuar ekonomike e Shqipërisë, Bosnjë dhe Hercegovinës, Kosovës, Maqedonisë së Veriut dhe Serbisë të arrijë në 3,2 për qind në vitin 2025, që është 0,5 pikë përqindjeje më pak se projeksionet e mëparshme. Rritja parashikohet të përshpejtohet në 3,5 për qind në vitin 2026.

Në Shqipëri parashikohet një rënie prej 0,3 pikë përqindjeje, me rritje 3,2 për qind. Në Bosnjë dhe Hercegovinë dhe Mal të Zi, gjithashtu ka ulje prej 0,5 pikë përqindjeje, duke arritur përkatësisht 2,7 për qind dhe 3 për qind. Në Kosovë ka një rënie prej 0,1 pikë përqindjeje (3,8 për qind), ndërsa në Serbi rënia është 0,7 pikë përqindjeje, me rritje të parashikuar prej 3,5 për qind.

Nevoja për riformulimin e strategjive për tregun e punës
Shaoqing Yu, drejtor i Divizionit për Ballkanin Perëndimor në Bankën Botërore, theksoi se rajoni ka bërë përparim në ngushtimin e hendekut zhvillimor me ekonomitë e avancuara të BE-së, por rritja aktuale nuk është e mjaftueshme për ta mbyllur këtë hendek.

“Për t’i ndihmuar rajonit, është e rëndësishme të riformulohen strategjitë për tregun e punës: të inkurajohet pjesëmarrja më e madhe në tregun e punës, të përmirësohen aftësitë e popullsisë dhe të nxitet rritja e bizneseve përmes zhvillimeve digjitale,” theksoi Yu.