Kujtim Gashi, kandidati i PDK-së për deputet – profili, karriera dhe angazhimet politike

Kujtim Gashi, i lindur më 12 shtator 1981 në Prizren, është një nga figurat e njohura politike të Partisë Demokratike të Kosovës dhe aktualisht deputet në Kuvendin e Republikës së Kosovës. Ai u zgjodh deputet në zgjedhjet e vitit 2019, duke u renditur në mesin e tetë kandidatëve më të votuar nga lista e PDK-së. Para angazhimit në Kuvend, Gashi ka shërbyer si Ministër i Kulturës, Rinisë dhe Sportit, ku gjatë mandatit të tij u shënuan një sërë projektesh dhe investimesh në kulturë, rini dhe sport.

Gashi kreu shkollimin e mesëm në Gjimnazin Ekonomik “Ymer Prizreni”, ndërsa studimet universitare dhe masterin i përfundoi në Fakultetin e Edukimit në Universitetin e Prishtinës, me specializim në Menaxhim të Arsimit. Ai ka ndjekur edhe trajnimet profesionale të lidershipit në Shtetet e Bashkuara të Amerikës.

Karriera e tij politike filloi herët, fillimisht përmes angazhimit në organizata studentore, duke themeluar Shoqatën për Aftësim Profesional të Studentëve (ShAPS) dhe revistën “Ardhmëria”. Në nivel lokal, Gashi ka shërbyer si koordinator i sektorit të rinisë dhe më pas si kryesues i Kuvendit Komunal të Prizrenit. Ai ka mbajtur pozita udhëheqëse brenda PDK-së, përfshirë atë të sekretarit të partisë në Prizren dhe anëtarit të këshillit drejtues.

Gjatë viteve 2017–2020, në postin e Ministrit të Kulturës, Rinisë dhe Sportit, Gashi udhëhoqi një sërë projekte të rëndësishme. Në fushën e kulturës u mbështetën mbi 400 projekte, u rrit buxheti për Qendrën Kinematografike të Kosovës dhe Kosova u përfaqësua në Bienalen e Venedikut. Ai nënshkroi marrëveshje bashkëpunimi me institucione ndërkombëtare dhe përkrahu botues, autorë dhe aktivitete artistike.

Në sektorin e rinisë, Gashi mbështeti programe për ndërmarrësi, trajnime profesionale, qendra rinore dhe u angazhua në themelimin e Fondit Rinor. Ndërsa në sport, gjatë mandatit të tij u zhvilluan projekte infrastrukturore në disa komuna, u përkrahën sportistët elitarë, u shënua progres në kualitetin e infrastrukturës sportive dhe u arritën rezultate të rëndësishme ndërkombëtare nga sportistët kosovarë.

Në fushën e trashëgimisë kulturore, Gashi themeloi Inspektoratin e Trashëgimisë Kulturore, mbështeti restaurime të objekteve me rëndësi historike dhe përkrahu projekte arkeologjike në lokalitete të ndryshme të vendit.

Kujtim Gashi flet shqip, anglisht, italisht dhe gjermanisht. Me përvojën e tij institucionale dhe angazhimin shumëvjeçar, ai është një ndër kandidatët e PDK-së për deputet në zgjedhjet parlamentare të 28 dhjetorit.